Um viðburðinn

Tónleikaröðin Söngvaskáld Suðurnesja hlaut einstaklega góðar mótttökur á síðasta ári þar sem færri komust að en vildu og verður áfram haldið að kynna söngvaskáld og ríkan tónlistararf Suðurnesja í tali og tónum.

Tónleikarnir verða haldnir í Bergi í Hljómahöll þar sem kynnt verður sagan á bak við tónlistina í heimilislegri stemmningu. Kynnir og handritshöfundur er Dagný Gísladóttir, söngvari er Elmar Þór Hauksson og útsetningar og píanóleikur er í höndum Arnórs B. Vilbergssonar sem nýverið hlaut Menningarverðlaun Reykjanesbæjar.

Tónlistarröðin mun árið 2017 fjalla um: Magnús Þór Sigmundsson, Ingibjörgu Þorbergsdóttur og Þorstein Eggertsson. Fjallað verður um menningarlegan bakgrunn þeirra og tónlistarsögu í máli samhliða tónlistarflutningi á þremur kvöldum í Hljómahöll 2. febrúar, 2. mars og 6. apríl. Þess má geta að Ingibjörg Þorbergs fagnar 90 ára afmæli á árinu.

Ingibjörg Þorbergsdóttir 2. febrúar 2017

Ingibjörg Þorbergs er án nokkurs vafa eitt af stóru nöfnunum í íslenskri tónlistarsögu. Hún varð snemma þekkt söngkona og að auki kunn fyrir lög og ljóð barnalaga og jólalaga sem hafa lifað fram á þennan dag. Má þar nefna Hin fyrstu jól, jólaköttinn og Aravísur. Ingibjörg var fyrst íslenskra kvenna til að ljúka einleikaraprófi á blásturshljóðfæri og frumkvöðull í plötuútgáfu en hefur varðað leið kvenna í íslenskri tónlist með framlagi sínu. Ingibjörg nær þeim áfanga að verða níræð á árinu og því við hæfi að kynna þetta fjölhæfa söngvaskáld.

Þorsteinn Eggertsson 2. mars 2017

Þeir eru ófáir lagatextarnir sem Þorsteinn Eggertsson hefur samið, og eins og sagt er í laginu: ef þú vilt fá skammt af ánægju og gleði og hamingjuvon, þá ættir þú að hlusta á texta eftir hann Þorstein Eggertsson. Þorsteinn var um tíma söngvari hjá KK sextettinum og söng með Hljómsveit Guðmundar Ingólfssonar í Keflavík og beatniks áður en hann sneri sér að textagerð. Eftir Þorstein liggur mikið magn dægurlagatexta en rúmlega fjögur hundruð þeirra hafa verið gefnir út í flutningi ýmissa tónlistarmanna og má þar nefna Fjólublátt ljós við barinn, Rabbarbara Rúna og Er ég kem heim í Búðardal.

Magnús Þór Sigmundsson 6. apríl 2017

Magnús Þór Sigmundsson er kunnastur fyrir samstarf sitt með öðru söngvaskáldi af Suðurnesjum, Jóhanni Helgasyni, en saman störfuðu þeir sem Magnús & Jóhann, Pal brothers og í hljómsveitinni Change. Seinna skildu leiðir og hefur magnús Þór gefið út fjöldann allan af sólóplötum meðal annars ætlaðar börnum. Mörg laga Magnúsar Þórs hafa notið vinsælda og má þar nefna blue Jean Queen, Ást, Alfar, Jörðin sem ég ann og Ísland er land þitt sem stundum er kallað hinn þjóðsöngur Íslands.