Um viðburðinn

Upplýsingar til tónleikagesta

Samkvæmt núgildandi reglugerð um sóttvarnir verða allir gestir að sýna neikvæða niðurstöðu úr hraðprófi við komu á viðburði yfir 500 manns, og á það því við um þessa tónleika, ásamt grímuskyldu.

Á höfuðborgarsvæðinu er hægt að fara í hraðpróf á eftirfarandi stöðum:

• Heilsugæsla höfuðborgarsvæðisins býður upp á hraðpróf á Suðurlandsbraut 34; www.hradprof.covid.is

• Covidtest; býður upp á hraðpróf bæði á Kleppsmýrarvegi 8 og í Hörpu. Aðstaðan í Hörpu er í kjallara hússins, beint á móti inngangi frá bílastæðakjallara. www.covidtest.is athugið að hraðprófsstöð í Hörpu lokar kl. 18

• Öryggismiðstöðin býður upp á hraðpróf við Kringluna og BSÍ;  www.testcovid.is

Utan höfuðborgarsvæðis www.hradprof.covid.is

Efnisskrá:
Sinfónía nr. 6 í h-moll eftir Dímítríj Shostakovitsj
Sinfónía nr. 6 í h-moll eftir Pjotr Tsjajkovskíj,
Hljómsveitarstjóri: Klaus Mäkelä

Heimsviðburður af hæsta gæðaflokki

Concertgebouw hljómsveitin kemur fram í Eldborg, Hörpu þann 10. nóvember, kl 19:30, undir stjórn hins bráðunga og eftirsótta hljómsveitarstjóra, Klaus Mäkelä. Um er að ræða heimsviðburð af hæsta gæðaflokki sem örsjaldan gefst tækifæri til að upplifa á Íslandi. Tónleikarnir eru hápunktur í glæsilegri dagskrá í tilefni af 10 ára afmæli Hörpu.

Kirsuber á kirsuber ofan

Á efnisskrá tónleikanna eru tvær af stórbrotnustu sinfóníum tónbókmenntanna, sem tefla fram sterkum andstæðum og gefa áhrifaríka sögulega og listræna mynd af gullöld sinfónískrar tónlistar. Hin epíska sjötta sinfónía Dímítríj Shostakovitsj ögraði sóvéskum gagnrýnendum árið 1939. Hún er full af togstreitu, spennu og öfgafullum tilfinningum. Hin tregafulla sjötta sinfónía Tsjajkovskíj, með undirtitilinn „Pathétique“, var hinsta kveðja höfundar til lífsins og er af mörgum talin einn af hápunktum sinfónískrar tjáningar. Framúrskarandi, bráðungur hljómsveitarstjóri Klaus Mäkelä er aðeins 25 ára gamall en er nú þegar einn eftirsóttasti hljómsveitarstjóri heims. Hann hefur starfað sem aðalhljómsveitarstjóri Fílharmóníuhljómsveitarinnar í Oslo frá 2020 og verður auk þess aðalhljómsveitarstjóri Orchestre de Paris frá haustinu 2022. Klaus Mäkelä stjórnar reglulega bestu sinfóníuhljómsveitum heims, þar á meðal Concertgebouw hljómsveitinni.

Eldborgarsalurinn býður upp á það besta

Concertgebouw hljómsveitin er ein allra besta sinfóníuhljómsveit heims. Hljómsveitin þykir skara fram úr fyrir silkimjúkan hljóm, mikla dýnamíska breidd og gífurlega fjölbreytta nálgun í túlkun. Hljómsveitin var stofnuð árið 1888 og á heimili sitt í hinu einstaka tónlistarhúsi í Amsterdam, Concertgebouw. Mörg þekktustu tónskáld sögunnar hafa stjórnað flutningi hljómsveitarinnar á sínum verkum, þar á meðal Richard Strauss, Gustav Mahler og Igor Stravinsky. Hljómsveitin leikur um 80 tónleika í sínum heimasal á ári en leggur auk þess áherslu á tónlistarflutning í bestu tónleikasölum heims. Það er því einstakt tilhlökkunarefni að fá hljómsveitina í fyrsta sinn til Íslands og að hlýða á flutning hennar í Eldborgarsal Hörpu.