Um viðburðinn

Í tilefni þess að 10 ár eru liðin frá því fyrsta tónleikasýning Rigg viðburða var sett upp í Hörpu verður sérstök afmælisveisla Heiðurstónleika Freddie Mercury föstudagskvöldið 18. júní kl. 20:00 í Eldborg.

Framvarðasveit hljóðfæraleikara og söngvara flytja laga-og textasmíðar Freddie Mercury og Queen í magnaðri veislu sem enginn má missa af.

Söngur:
Magni Ásgeirsson
Dagur Sigurðsson
Eyþór Ingi Gunnlaugsson
Friðrik Ómar
Matthías Matthíasson

Gestasöngkona
Dísella Lárusdóttir

Raddir:
Regína Ósk
Íris Hólm Jónsdóttir
Alma Rut Kristjánsdóttir
Davíð Smári Harðarsson
Ingunn Friðriksdóttir
Ína Valgerður Pétursdóttir

Hljómsveit:
Stefán Örn Gunnlaugsson
Benedikt Brynleifsson
Diddi Guðnason
Kristján Grétarsson
Einar Þór Jóhannsson
Ingvar Alfreðsson
Róbert Þórhallsson

Hljóð:
Haffi Tempó
Björgvin Sigvaldason

Lýsing:
Helgi Steinar

Verkefnastjórn:
Haukur Henriksen

Samsetning, grafík og stjórnandi:
Friðrik Ómar

Framleiðandi:
Rigg viðburðir

Fylltist á sjö mínútum!

Það var röð út úr dyrum í Hörpu þegar miðasala hófst á Heiðurstónleika Freddie Mercury síðla árs 2011. Það seldist upp á tónleikana á 7 mínútum og bæta þurfti þremur tónleikum við til að anna eftirspurn. Síðan þá hefur stórskotalið Rigg viðburða flutt tónleikana nær árlega fyrir fullu húsi sem gerir þá að vinsælustu tónleikasýningu landsins fyrr og síðar. Raunar var þetta í fyrsta sinn sem viðburður á Íslandi var auglýstur sem „tónleikasýning”. Umgjörð og framleiðsla settu nýtt viðmið í tónleikahaldi hér á landi og ruddu brautina fyrir næstu verkefni Rigg viðburða. Grjótharðir aðdáendur Freddie og Queen sem ólust upp við þessa tónlist hafa margir hverjir notað tækifærið og tekið með sér yngri kynslóðir til að upplifa tónlistina í lifandi fluttningi.

Úr umfjöllun Morgunblaðsins 11. september 2012:

„Ég vissi svo sem að á sviði yrði hópur úrvalstónlistarmanna. Bjóst við miklu frá þeim en fékk svo miklu meira en það, þetta var stórbrotið hjá hópnum. Flæðið og þéttleikinn voru óaðfinnanleg og krafturinn læsti sig um hvert bein í líkama áhorfenda. Það var unun að hlýða á þá Magna Ásgeirsson, Matthías Matthíasson og Eyþór Inga Guðlaugsson. Þeir lifðu sig inn í flutninginn og augljóst að þeir höfðu gaman af. Samspil söngvara, bakradda og hljómsveitarmeðlima setti stóran svip á tónleikana og hlýjan sem ríkir milli einstaklinganna í hópnum skilaði sér út í sal. Hápunktarnir voru nokkrir, Bohemian Rhapsody, innkoma Huldu Bjarkar Garðarsdóttur óperusöngkonu og Who Wants to Live Forever. Það ætlaði allt um koll að keyra í Hofi. Eftir hlé stóðu settlegu áhorfendurnir reglulega upp til að sýna hrifningu sína og var marga eflaust farið að svíða í lófana undan klappi. Eiginmaðurinn missti röddina og ég þurrkaði tárin. Fullkomin skemmtun. Athugulir taka kannski eftir því að enn hefur ekki verið minnst á Friðrik Ómar Hjörleifsson en hann verður einfaldlega að fá sér klausu. Friðrik Ómar hefur alltaf verið Evróvisjónpoppari í mínum huga og ég hef nánast ekkert gefið honum gaum. Jú, ég var hrifin af disknum sem hann og Jógvan gáfu út en ekki dolfallin. Af öllum þeim listamönnum sem stigu á svið þá vann Friðrik Ómar mesta aðdáun mína. Krafturinn og tærleikinn í röddinni blómstraði í meistaraverkum Queen. Freddie Mercury hefur örugglega tekið sér hlé frá störfum sínum á himnum til að hlýða á Friðrik Ómar. Að undanskilinni óaðfinnanlegri röddinni þá vílaði hann ekki fyrir sér að sýna listir sínar á hverju hljóðfærinu á fætur öðru og það sem snart mig mest var hversu stoltur hann var af hópnum sínum. Bros hans leyndi sér ekki þegar Kristján Grétarsson fór mikinn á gítarnum, augnatillit til bakraddanna og lítil nikk hér og þar. Hann náði tengslum. Hann náði tengslum við tónlistarmennina, áhorfendur og mig.”
- Signý Gunnarsdóttir