Um viðburðinn

Phil Doyle´s PolyHarmonic Ensemble (US/IS)

Hlustun – sannarleg hlustun – er náin innlifun.

Hugmyndin að PolyHarmonic Ensemble liggur í orðinu „Akroasis“ en það er hugtak sem Forn-Grikkir notuðu til að lýsa djúpri hlustun á heiminn, öfugt við að berja hann einungis augum. PolyHarmonic Ensemble leitast við að kanna náttúruleg hlutföll sem finnast víða í umhverfinu, þjóðfélaginu og menningunni og umbreyta þeim í laglínur, spunabrot og nýstárlegar hljómfræðilegar mótanir.

Verkefnið á sér um áratugs langa sögu og er afrakstur rannsókna á yfirtónum, tíðni og hlutföllum undir leiðsögn Drew Lesso sem áður var nemandi Karlheinz Stockhausen. Það er leitt af Bandaríkjamanninum Phil Doyle sem hefur verið búsettur á Íslandi í nokkur ár.

Hljómsveitin samanstendur af nokkrum af færustu tónlistarmönnum Íslands (Einar Scheving, Kjartan Valdemarsson, Mikael Máni Ásmundsson, Óskar Guðjónsson, Snorri Sigurðarson, Tómas Jónsson) en auk þeirra má einnig finna þar hljóðfæraleikarann, hljóðmanninn, pródúsentinn og Grammy verðlaunahafann Chris Palowitch sem og kvikmyndagerðarmanninn Andra Thor Birgisson sem glæðir tónlistina sjónrænu lífi með verkum sínum. Áhorfendur munu ekki einungis heyra einstaka sköpun hvers tónlistarmanns heldur líka óminn af eldfjöllum, túlkun á gögnum um íbúa og íbúafjölda, fjöll og fleira. Þetta er heimsfrumsýning á þessum hópi listamanna sem auðveldlega gæti talist sá sem hefur hvað mest listrænt gildi af öllum þeim hópum sem Phil Doyle hefur sett saman í gegnum tíðina.

*Athugið – miði á þessa tónleika gildir einnig á tónleika Melissa Aldana Quartet kl. 21:15 í sama sal.

Phil Doyle (US) : saxófónn / rafræn tréblásturshljóðfæri
Einar Scheving (IS) : trommur
Óskar Guðjónsson (IS) : saxófónar
Snorri Sigurðarson (IS) : flugelhorn / rafræn málmblásturshljóðfæri
Kjartan Valdemarsson (IS) : hljómborð
Mikael Máni Ásmundsson (IS) : gítar
Tómas Jónsson (IS) : hljómborð
Chris Palowitch (US) – hljóðvinnsla

------------------------------------------------------------------------------------------------------------------------------------------------------------------

Melissa Aldana Quartet (US)

Saxófón-snillingurinn Melissa Aldana kemur fram á Jazzhátíð Reykjavíkur 2021 en kvartett hennar leikur í Norðurljósum 4. september næstkomandi. Auk hennar skipa kvartettinn þeir Pablo Menares á bassa, Kush Abadey á trommur og Lage Lund á gítar.

Á nokkrum árum hefur frægðarsól Melissu Aldana risið hratt og er hún nú talin í fremstu röð tenór saxófónleikara í jazzgeiranum. Hún er upprunalega frá Chile og eftir að hún útskrifaðist frá Berklee College of Music í Boston vakti hún strax mikla eftirtekt þegar fyrsta plata hennar, Free Fall, kom út árið 2010. Á þeirri skífu var tignarleg, en jafnframt kraftmikil, spilamennska hennar fyrirferðarmikil en einnig snilldarlega útfærðar tónsmíðar. Hún var fyrsta konan, og reyndar fyrsti tónlistarmaðurinn frá Suður Ameríku, til að vinna hina frægu „Thelonious Monk Jazz Saxophone“ keppni en með þeim sigri árið 2013 má segja að Melissa Aldana hafi komist almennilega á kortið í heimi jazz-saxófónsins.

Á nýjustu plötu sinni, Visions, sækir hún innblástur í uppruna sinn og arfleifð listakvenna frá Rómönsku Ameríku, ekki síst Frida Kahlo. Platan kom út þann 24. maí 2019 en á henni leika ásamt Melissu þeir Sam Harris á píanó, Pablo Menares á bassa, Tommy Crane á trommur og Joel Ross á víbrafón.

Það er mikill fengur fyrir jazzáhugafólk og áhugafólk um tónlist almennt að fá tækifæri til að hlýða á þessa stórkostlegu tónlistarkonu og hljómsveit hennar á Jazzhátíð.

“Her tone is as beautiful as her personality... I am sure you will agree.” – Jimmy Heath

“ . . . one of the more exciting young tenor saxophonists today” – The New York Times

“ . . . cultured, emotionally weighted, purposeful.” – The Boston Globe

"With its richly textured soundscapes and emotionally arresting material, Visions makes a clear connection to Kahlo and other Latina pathbreakers past and present... Melissa Aldana [is] a bandleader and musician at the top of her game." – Brian Zimmerman, Jazziz Magazine

“... such a monumental statement... Aldana and Ross’ ferocious exploration of the song’s theme that displays the deft musicality Visions showcases over 12 cuts.” – Dave Cantor, DownBeat Magazine

MELISSA ALDANA QUARTET:

Melissa Aldana : tenór saxófónn
Pablo Menares : bassi
Kush Abadey : trommur
Lage Lund : gítar