Tix.is

  • Frá 2. desember
  • Til 29. desember
Um viðburðinn

Á þessum fordæmalausu tímum, þar sem hópsamkomur eru bannaðar og lítið verður um hefðbundna listviðburði fyrir jólin, þurfum við að hugsa út fyrir kassann og fá hugmyndir sem færa okkur jólaandann á silfurfati en halda á sama tíma í heiðri allar sóttvarnir.

Ævintýri í Jólaskógi gerir einmitt þetta. Um er að ræða tæplega klukkutíma langa sýningu þar sem áhorfendur ganga í litlum hópum um skóginn í Guðmundarlundi, vopnaðir vasaljósum og hitta á ferðum sínum persónur úr jólafjölskyldu okkar Íslendinga, þau Grýlu, Leppalúða, Hurðaskelli og Skjóðu.

Sýningar hefjast á 10 mínútna fresti og byrja ekki fyrr en farið er að skyggja. Þannig byrjar fyrsta sýning hvers dags klukkan 17.00 og leggur þá fyrsti hópurinn af stað í vasaljósagöngu inn í skóginn. Ferðalagið hefur verið varðað með jólakúlum, luktum og öðru jólaskrauti svo áhorfendur eigi það ekki á hættu að villast í skóginum.

Eftir stutta göngu koma áhorfendur svo að fyrsta „sviðinu“ þar sem Skjóða tekur á móti þeim og flytur einleikinn „Fyrir jólin“. Verkið er tæpar tíu mínútur í flutningi og þegar því lýkur heldur hópurinn áfram ferð sinni um skóginn. Litlu innar rekast áhorfendur á Leppalúða sem segir söguna „Jólagrauturinn“ og enn lengra inn í skóginum hittum við fyrir jólasveinamóðurina sjálfa, tröllskessuna Grýlu. Hún færir okkur í allan sannleikann um „Það besta við jólin“. Að lokum leiðir ferðalagið hópinn okkar til Hurðaskellis sem flytur „Jólaball“ í miðjum skóginum í Guðmundarlundi og rekur með því smiðshöggið á sýninguna.

Áhorfendur eru hvattir til að klæða sig eftir veðri, koma vel skóaðir, með vasaljós og ekki er verra að hafa nesti meðferðis sem hægt er að gæða sér á að sýningu lokinni. Það er fátt betra en heitt kakó á brúsa eftir skemmtilega jólagöngu í skóginum.

Ævintýri í Jólaskógi er eftir Önnu Bergljótu Thorarensen og er það hún, ásamt Andreu Ösp Karlsdóttur, Sigsteini Sigurbergssyni og Stefáni Benedikt Vilhelmssyni sem ber ábyrgð á því að þau Grýla, Leppalúði, Hurðaskellir og Skjóða skili sem bestu verki. Fjórmenningarnir eru þekktastir fyrir störf sín með Leikhópnum Lottu og eru því vön að setja upp sýningar utandyra þó vissulega sé þetta í fyrsta sinn sem þau velja náttúruna sem sýningarstað svona að vetri til. 

Við mælum með sýningunni fyrir fjögurra ára og eldri en að sjálfsögðu eru allir velkomnir til okkar. Leiðin er þó ekki fær kerrum svo yngstu börnunum þarf að halda á ef þið þurfið að hafa þau með í för. Athugið að allir verða að vera með miða óháð aldri. Þó biðjum við ykkur um að skilja hunda eftir heima og er það bæði svo þeir trufli ekki sýninguna eða aðra gesti.

Miðaverð er 2.500 krónur á mann og þurfa allir að vera með miða óháð aldri.