Tix.is

  • 08. des. - Kl. 19:30
Miðaverð:3.990 - 4.400 kr.
Um viðburðinn

Salurinn og landslið píanóleikara á Íslandi fagna 250 ára afmæli Ludwigs van Beethoven með tónleikaröðinni Beethoven í 250 ár.

Beethoven samdi 32 píanósónötur sem spanna nær alla ævi hans eða árin 1795 – 1827. Nú hafa píanóleikarar á Íslandi tekið sig saman og sameinast um að flytja allar píanósónöturnar á 9 tónleikum í Salnum.

 

Efnisskrá:

 

Píanósónata nr. 16 í G-dúr, opus 31 nr. 1          
Píanóleikari:       Elín Arnardóttir 

 

Píanósónata nr. 12 í As-dúr, opus 26                  
Píanóleikari:       Valgerður Andrésdóttir

             

Hlé

 

Píanósónata nr. 4 í Es-dúr, opus 7 (Grand Sonata)        
Píanóleikari:       Nína Margrét Grímsdóttir

Píanósónata nr. 14 í cís-moll, opus 27 nr. 2 (Sonata quasi una fantasia – Tunglskinssónatan)
Píanóleikari:       Ástríður Alda Sigurðardóttir


Arnar Jónsson leikari les stutta pistla úr þýðingum Árna Kristjánssonar píanóleikara um Beethoven á undan hverri sónötu.

Um flytjendur: 

Ástríður Alda Sigurðardóttir píanóleikari lauk einleikaraprófi frá Tónlistarskólanum í Reykjavík undir handleiðslu Önnu Þorgrímsdóttur. Framhaldsnám stundaði hún hjá Reiko Neriki við Indiana University. Ástríður sótti námskeið og einkatíma í píanóleik og kammertónlist hjá listamönnum á borð við Geörgy Sebök og Janos Starker. Ástríður hefur komið víða fram á tónleikum, m.a. sem einleikari í píanókonserti Jórunnar Viðar og 2. píanókonserti F. Chopin með Sinfóníuhljómsveit Íslands. Árið 2010 gaf hún út sólóplötuna CHOPIN. Ástríður er einnig meðlimur Elektra Ensemble.

 

Elín Arnardóttir lauk MMUS gráðu í píanóleik frá Brandon University í Kanada og hefur kennt í Tónsölum, Tónlistarskólann DoReMí og við Suzukitónlistarskólann í Reykjavík. Hún hefur lokið réttindum til Suzukikennslu. Elín lauk BMUS gráðu í píanóleik frá Listaháskóla Íslands. Hún hefur tekið þátt í fleiri keppnum hér á landi og hefur meðal annars unnið til verðlauna í EPTA keppni á Íslandi. Elín lék einleik með Sinfóníuhljómsveit Íslands í Janúar 2012 í kjölfar sigurs í keppninni Ungir Einleikarar.

 

Dr. Nína Margrét Grímsdóttir er ein af virtustu og reyndustu píanóleikurum landsins. Hún hefur komið fram víða um heim sem einleikari með hljómsveitum og kammertónlist við lofsamlegar viðtökur gagnrýnenda. Hún hefur hljóðritað fyrir útvarp og sjónvarp auk fimm útgefinna geisladiska. Frumkvöðlarannsóknir hennar, fyrirlestrar og hljóðritanir á sviði íslenskrar píanótónlistar marka þáttaskil í íslenskri tónlistarsögu. Nína Margrét er deildarstjóri framhaldsdeildar Tónskóla Sigursveins og kennari við píanódeild Tónlistarskóla Kópavogs.

 

Valgerður Andrésdóttir lauk einleikaraprófi frá Tónlistarskólanum í Reykjavík. Hún stundaði nám við Tónlistarháskólann í Berlín þaðan sem hún lauk prófi árið 1992. Hún bjó í Kaupmannahöfn í nokkur ár þar sem hún starfaði við kennslu og píanóleik. Valgerður hélt sína fyrstu einleikstónleika 1990 og síðan þá hefur hún haldið reglulega tónleika og spilað með ýmsum kammerhópum og söngvurum. Hún hefur m.a. unnið með Caput hópnum og Sinfóníuhljómsveit Íslands. Valgerður starfar nú við Tónlistarskólann í Hafnarfirði

 

Beethoven í 250 ár er styrkt af Lista- og menningarráði Kópavogs, Mennta- og menningarmálaráðuneyti – Tónlistarsjóði og Tónlistarfélagi Reykjavíkur.