Um viðburðinn

Eurovision-myndin um Hatara aftur í bíósal á hátíðlegri styrktarsýningu

A Song Called Hate eða Lagið um hatrið, heimildarmyndin sem fylgir meðlimum Hatara á Eurovision-ferð til Ísrael og Palestínu, verður sýnd á hátíðarsýningu í Bíó Paradís sunnudaginn 7. nóvember kl. 20.

Allur ágóði af sýningu Lagsins um hatrið rennur óskiptur til Sabreen, menningarsamtakanna sem reka hljóðver, í Sheikh Jarrah-hverfinu í Austur-Jerúsalem. Marmið Sabreen er að stuðla að óheftri tónlistarsköpun og tónlistaruppeldi Palestínumanna. Fjárhagsstaða þeirra hefur verið tvísýn í veirufaraldri svo ekki séu nefndar takmarkanir sem hamla samstarf milli Palestínumanna í Jerúsalem, Vesturbakkanum og Gaza. Í fjörutíu ára sögu samtakanna hefur þörfin sjaldan verið eins brýn.

“Við kynntumst mikið af listafólki í gegnum Sabreen stúdíóið sem við heimsóttum fimm við gerð heimidarmyndarinnar. Þarna er unnið magnað starf sem veitir ungum listamönnum tækifæri til að stíga sín fyrstu skref. Það er pabbi Bashar, Said Murad sem leiðir þetta starf. Við kynntumst því vel hvað stuðningur hans við frumlegar og róttækar hugmyndir er mikilvægur og nutum góðs af við gerð heimildamyndarinnar,” segir Anna Hildur Hildibrandsdóttir leikstjóri og framleiðandi A Song Called Hate.

Lagið um hatrið hefur farið sigurför síðan hún var frumsýnd árið 2020. Myndin hefur verið sýnd á yfir 20 alþjóðlegum hátíðum og er komin í dreifingu víða. Hún vann nú síðast til verðlauna sem heimildarmynd ársins á Eddunni. Þátttaka Hatara í Eurovision var umdeild á sínum tíma. Myndin segir frá mörgu sem gerðist á bak við tjöldin og ekki síst listrænu samstarfi og samtali Hatara við Bashar Murad og forsvarsmanna Trashy Clothing í Palestínu sem unnu með þeim. Í myndinni kemur fram hversu flókið slíkt samstarf getur verið í þeim aðstæðum sem Palestínumenn búa við.

„Fréttir frá Sheikh Jarrah hafa verið átakanlegar og Bashar hefur verið í miðri hringiðunni allan tímann. Við fögnum því að heimildarmyndin leggi Sabreen-samtökunum lið með svona bíósýningu“ segir Matthías Tryggvi Haraldsson söngvari Hatara og frændi hans Klemens bætir við: „Sabreen kemur óbeint við sögu í myndinni. Þótt það sé ekki aðalatriðið í sögunni eiga þessi samtök stóran hluta í okkar huga og þarna skyldum við betur tilganginn með vegferð okkar.“ 

Styrktarsýningin er skipulögð af framleiðslufyrirtæki myndarinnar Tattarrattat í samstarfi við Hatara, Sabreen-samtökin og Bíó Paradís.

Forsala er hafin hjá Bíó Paradís og er miðaverð 1.800 krónur.

• ATHUGIÐ! Árskort, klippikort, gjafabréf, frímiðar frá Bíó Paradís gilda ekki á þessa sérsýningu!