Event info

Gæðablóðin taktvissu í Moses Hightower ætla að ylja íbúum Hvolsvallar með tónleikum á Midgard Base Camp laugardaginn 12. janúar.

Hljómsveitin hefur í um áratug verið einn helsti kyndilberi sálarskotinnar dægurtónlistar á klakanum, eða allt síðan dúnmjúki valsinn „Búum til börn“ tók að heyrast á öldum ljósvakans árið 2008. Fljótlega eftir það leit dagsins ljós samnefnd plata, og voru gagnrýnendur og hlustendur sammála um að hér kvæði við nýjan tón í íslenskri tónlist. 

Útsetningar, hljóðheimur og spilamennska sóttu óspart í sálartónlist 7. og 8. áratugar, en textar þóttu minna á íslenskt lopapeysupopp frá sama tímabili, ekki síst Spilverk þjóðanna. Í öllu falli var plötunni tekið fagnandi, og lögin „Vandratað“ og „Bílalest út úr bænum“ hljómuðu látlaust úr viðtækjum landsins. Önnur Mósebók fylgdi í kjölfarið, og sá angurværi og indískotnari tónn sem þar kvað við virtist falla í kramið hjá skammdegisþjóðinni. 

Platan hlaut fjölda verðlauna og mikla útvarpsspilun, og fór að endingu í gullsölu. Þriðja breiðskífa sveitarinnar, Fjallaloft, kom út um mitt síðasta ár, og lög af henni verða fyrirferðarmikil á Hattinum í bland við lummur á borð við „Stutt skref“, „Háa C“ og „Sjáum hvað setur“. 

Nýjasta lag sveitarinnar, Ellismellur, verður með í för, og hver veit nema hún prufukeyri eitt eða tvö lög af næstu plötu sveitarinnar, en vinna við hana er í fullum gangi.

3.500 kr í forsölu og 4.000 kr við hurð