Event info

Frægasta ástarsaga allra tíma í nýrri útfærslu framsækinna listamanna

Rómeó og Júlía er saga af sannri ást en um leið ástsýki og ungæðishætti. Í forgrunni verður mögnuð barátta ungrar konu gegn yfirþyrmandi feðraveldi. Fegurstu sögurnar geta sprottið upp úr hræðilegustu aðstæðunum. Leikritið Rómeó og Júlía er frægasta ástarsaga allra tíma, og birtist hér í nýrri þýðingu og útfærslu sem hrífur áhorfandann með inn í heillandi og hættulegan heim.

Hugmyndin er að feta einstigi milli leikrænnar flugeldasýningar og djúpstæðs harmleiks, þar sem bæði grátur og hlátur fá rými.

Þorleifur Örn Arnarsson er einn fremsti leikstjóri Evrópu og einn listrænna stjórnenda hins virta leikhúss Volksbühne. Hann á að baki geysivinsælar sýningar á Íslandi á borð við Engla alheimsins og Njálu. Nú hefur hann gengið til liðs við nýtt listrænt teymi Þjóðleikhússins þar sem hann mun starfa á næstu árum. Þorleifur hefur leikinn með sýningu sem hvetur fólk til að skoða sjálft sig og aðstæður sínar í nýju samhengi.